Зеленски тврди дека на Украина ѝ недостигаат ракети, стигна одговор од ЕУ

Европската комисија одговори на тврдењата на украинскиот претседател Володимир Зеленски дека испораките на пресретнувачки ракети од меѓународните партнери се намалиле тројно, нагласувајќи дека Украина треба сама да ги дефинира и достави своите потреби за воена опрема.

— реклама —

Портпаролот на Европската комисија, Балаш Ујвари, изјави дека Европската Унија годинава веќе издвоила 8,5 милијарди евра за одбранбените потреби на Украина. Средствата се наменети за набавка на борбени авиони, ракети и беспилотни летала со краток и долг дострел.

Тој објасни дека украинските власти подготвуваат и доставуваат план за набавка на опрема, врз основа на кој Европската комисија ги разгледува барањата и одлучува за финансирањето.

— реклама —

„Украина може да побара пресретнувачки ракети или друга опрема, а ние ќе ги разгледаме тие барања. Комуникацијата е постојана, плановите за набавка редовно пристигнуваат, а ние ги обработуваме во најкус можен рок и ги реализираме исплатите“, рече Ујвари.

— реклама —

Тој додаде дека Украина може да бара средства и за набавка на опрема што не е произведена во Европската Унија, доколку за тоа постои оправдана потреба. Сепак, приоритет останува набавката на вооружување произведено во ЕУ и во Украина.

Портпаролот нагласи и дека нема да има прекин во финансирањето на украинската одбрана во текот на летниот период.

Изјавата на Европската комисија следува откако Зеленски на 5 август соопшти дека Украина располага со трипати помалку противбалистички ракети отколку во 2025 година, иако, како што рече, партнерските земји имаат доволни резерви. Претходно, на 30 јули, Европската комисија ѝ префрли на Украина 3,47 милијарди евра во рамките на одбранбената компонента на заемот, а најави и дополнителна исплата во текот на август.