Зеленски: Војниците на првата линија би можеле да заработуваат и до 7.000 долари месечно

Украинскиот претседател Володимир Зеленски најави зголемување на платите на војниците и отворање на повеќе можности за регрутирање странски доброволци, во обид да се надмине сериозниот недостиг од човечки ресурси во армијата по повеќе од четири години војна со Русија.

По состанокот со клучните министри, Зеленски порача дека владата ќе преземе конкретни чекори за финансиско зајакнување на одбраната и продолжување на реформите во вооружените сили.

— реклама —

„Се договоривме како финансиски да ја зајакнеме нашата одбрана и да продолжиме со трансформацијата на украинската армија“, изјави Зеленски во своето дневно обраќање, додавајќи дека првите зголемени исплати би можеле да започнат уште во јуни.

— реклама —

Украина обезбеди заем од 90 милијарди евра од Европската Унија, што ќе ѝ овозможи оваа година да ги зголеми трошоците за одбрана на рекордни 4,4 билиони гривни, односно околу 82,5 милијарди евра.

Според најавите, основната плата на војниците ќе биде зголемена за една третина и ќе изнесува 30.000 гривни, односно околу 600 евра. Војниците на првата борбена линија ќе добиваат просечна месечна плата од 300.000 гривни или околу 6.000 евра, што е значително повеќе од досегашните примања.

— реклама —

Покрај тоа, ќе бидат воведени и нови договори на определено време за борбени задачи, со времетраење од 10, 14 или 24 месеци.

— реклама —

Киев планира и да го зголеми бројот на странски доброволци во своите редови. Зеленски соопшти дека дал насоки да се отворат повеќе канали за регрутација на странски државјани заинтересирани да се приклучат на украинската армија.

Според проценките на украинските воени публикации, од почетокот на војната досега на страната на Украина се приклучиле околу 10.000 доброволци од повеќе од 70 земји.