Украинскиот претседател Володимир Зеленски го напушти Вашингтон задоволен, откако по неговата средба со американскиот претседател Доналд Трамп американскиот Сенат со големо мнозинство го поддржа продолжувањето на постапката за усвојување нов пакет санкции против земјите што со купување руска нафта го финансираат руското воено дејствување во Украина.
Според „Политико“, Зеленски го следел гласањето од галеријата на Сенатот, што претставува целосен пресврт во однос на неговата посета на Белата куќа во февруари 2025 година, кога јавно влезе во конфликт со Трамп.
Предложениот закон ќе му овозможи на американскиот претседател да воведе санкции против Русија, како и против државите што ѝ помагаат да ги заобиколи постојните ограничувања. Во него се предвидуваат и царини до 100 проценти за производи од земјите што купуваат најголеми количества руска нафта и гас, пред сè Кина и Индија.
„Целта е Путин да се доведе на преговарачка маса“, изјави републиканскиот сенатор Мајк Раундс по средбата на Зеленски со сенаторите и дел од членовите на Претставничкиот дом.
Според него, украинскиот претседател смета дека дополнителниот економски притисок би можел да го зголеми незадоволството во Русија и да го принуди рускиот претседател Владимир Путин посериозно да пристапи кон мировните преговори.
За време на разговорите во Конгресот, Зеленски повторно побара проширен пристап до американско вооружување, вклучително и дозвола за производство на системите за противвоздушна одбрана „Патриот“, дополнителни ракети-пресретнувачи PAC-3 и продолжување на користењето на сателитската мрежа „Старлинк“.
Според американските сенатори кои присуствувале на средбите, Зеленски и финскиот претседател Александер Стуб оцениле дека новите санкции би можеле да имаат исто, па дури и поголемо влијание врз завршувањето на војната отколку случувањата на бојното поле.
Во меѓувреме, дел од сојузниците на Трамп од движењето МАГА почнале да покажуваат поголема поддршка за Украина, а Трамп неодамна најави дека ќе ѝ овозможи на Украина производство на ракети за системот „Патриот“.
И покрај силната поддршка во Сенатот, законот сè уште не е конечно усвоен. Тој треба да помине низ двата дома на американскиот Конгрес, а Претставничкиот дом повторно ќе заседава во септември.
