Земјотрес со јачина од 5 степени регистриран во Кина

Земјотрес со јачина од 5 степени според Рихтеровата скала денеска го погоди северниот дел на Тибет, соопшти Германскиот истражувачки центар за геонауки (GFZ). Земјотресот бил на длабочина од околу 10 километри.

— реклама —

Епицентарот се наоѓал стотици километри северно од подрачјата на Непал и Тибет, кои во средата беа погодени од разорни поплави со голем број жртви и исчезнати лица.

— реклама —

Кинескиот центар за следење на земјотресите, пак, пријавил потрес со јачина од 4,7 степени во областа Нагчу во Тибет.

Новиот земјотрес се случува во период кога кинеските власти се соочуваат и со дополнителен ризик од поплави. Кина активирала мерки за одбрана од поплави од четврто ниво поради опасност од пробивање на природна брана и излевање на езеро создадено по одрон.

— реклама —

Кинеското Министерство за водни ресурси им наложило на локалните власти внимателно да ја следат состојбата со езерото и врнежите, а во округот Ѓиронг бил испратен и стручен тим.

Земјотресот е регистриран во момент кога спасувачките екипи продолжуваат со потрагата по исчезнати лица по катастрофалните поплави долж границата меѓу Непал и Тибет.