Жена од Норвешка доби судски спор против продавач на половен електричен автомобил, откако се покажало дека возилото има значително помал дострел од оној што ѝ бил ветен при купувањето.
Таа купила десет години стар модел Kia Soul EV за 5.500 евра, а продавачот ја уверил дека автомобилот може да помине околу 90 километри во зимски услови и до 200 километри во лето.
Но, уште на пат кон дома станало јасно дека реалноста е поинаква. По само 36 изминати километри, батеријата целосно се испразнила, по што купувачката веднаш побарала раскинување на договорот. Продавачот го одбил нејзиното барање.
По сервисниот преглед било утврдено дека високонапонската батерија има дефект. При тестирањето, сервисерите забележале дека проценетиот дострел се намалил за околу 15 проценти по само два изминати километри, по што возилото целосно престанало да работи.
Иако првично норвешкиот орган за решавање спорови пресудил во корист на продавачот, окружниот суд подоцна утврдил дека на купувачката ѝ биле дадени неточни информации за состојбата на возилото и неговиот дострел, па одлучил купопродажбата да биде поништена.
Пресудата сè уште не е правосилна, бидејќи продавачот поднел жалба.
