Жедта е нормален сигнал дека на организмот му е потребна течност, особено во топло време, по физичка активност или при недоволен внес на вода. Но, ако чувството на жед е постојано и не се намалува и покрај доволниот внес на течности, можно е да укажува и на одреден здравствен проблем.
Една од можните причини е дијабетес тип 1 или тип 2. Зголеменото ниво на шеќер во крвта ги поттикнува бубрезите да исфрлаат повеќе течност преку урината, што може да предизвика засилена жед и почесто мокрење. Доколку се појават и замор, ненамерно слабеење или често мокрење, се препорачува проверка на нивото на шеќер во крвта.
Чувството на жед понекогаш, всушност, може да биде последица на сува уста, односно ксеростомија. Таа може да се појави поради пушење, дишење преку уста и стареење, но и како последица на одредени лекови или здравствени состојби.
Промените во работата на тироидната жлезда исто така може да бидат поврзани со засилена жед. Во зависност од нарушувањето, може да се појават и сува уста, чувство на топлина, вознемиреност и други промени во организмот.
Продолжениот стрес може да влијае врз различни процеси во организмот, вклучително и врз крвниот притисок и рамнотежата на течности, па кај некои луѓе може да се јави и изразена жед.
И исхраната може да има влијание. Одредени намирници, како целерот, аспарагусот, цвеклото и магдоносот, имаат благо диуретичко дејство и можат да го зголемат мокрењето, а со тоа и потребата за течности. Сличен ефект кај некои луѓе може да има и исхраната со многу малку јаглехидрати, како што е кето-диетата.
Хормоналните промени за време на бременоста, перименопаузата и менопаузата исто така можат да влијаат врз балансот на течности во организмот и да предизвикаат засилено чувство на жед.
Зголемената жед може да се јави и при губење крв. Обилните менструални крвавења или други видови крвавење може да доведат до губење течности и анемија, што кај некои луѓе може да биде проследено со чувство на жед.
Постојат и поретки здравствени состојби кои можат да предизвикаат постојана жед, меѓу кои е дијабетес инсипидус, нарушувања на нивото на калциум во крвта, одредени бубрежни заболувања, како и несакани дејства од одредени лекови.
Доколку жедта е упорна, необјаснива и не се намалува и покрај доволниот внес на течности, особено ако е проследена со често мокрење, замор, слабеење или други симптоми, препорачливо е да се побара медицински совет.
