Златев: Воената академија ја прифати мојата иницијатива против Петар Богојески

Воената академија „Генерал Михаило Апостолски“ во Скопје ќе ги разгледува јавните настапи и ставови на доц. д-р Петар Богојески, откако уредникот на Радио Лидер, Љупчо Златев, поднел иницијатива до институцијата за испитување на неговата професионална и етичка одговорност, ова го соопшти Златев на социјалните мрежи.

Од Академијата одговориле дека доставените материјали ќе бидат разгледани од надлежните тела, кои треба да утврдат дали постојат повреди на професионалните и етичките обврски. Притоа нагласиле дека академската слобода и слободата на изразување не ја исклучуваат одговорноста на вработените.

— реклама —

Во одговорот се наведува дека Етичкиот кодекс предвидува можност за формално оградување од јавни ставови, како и иницирање постапка пред надлежниот работодавец, доколку постои правна основа.

Академијата истовремено се огради од личните политички и идеолошки ставови на своите вработени, посочувајќи дека нивните јавни настапи во лично својство не претставуваат официјални позиции на институцијата.

— реклама —

Од установата нагласуваат дека евентуалните мерки ќе зависат од утврдените факти и ќе бидат донесени по непристрасна постапка, со почитување на правата на засегнатите лица. Најавено е дека јавноста ќе биде информирана за заклучоците и преземените мерки во рамките на законските можности.

— реклама —

Иницијативата следува по реакциите на јавните настапи на Богојески, особено по неговото гостување во емисијата „Под лупа“ на ТВ Алфа. Претходно, Агенцијата за аудио и аудиовизуелни медиумски услуги ги осуди неговите ставови, оценувајќи дека со нив се релативизира и оправдува насилството врз жените и децата и се промовира нивната подредена положба.

Засега нема одлука дека Богојески ги прекршил професионалните или етичките обврски, ниту е изречена каква било санкција. Конечната оценка треба да ја дадат надлежните тела на Воената академија.

— реклама —