Цената на златото е на пат да ја заврши неделата со загуба од околу два процента, додека неизвесноста околу мировните разговори меѓу САД и Иран продолжува да создава турбуленции на глобалните пазари.
Во петокот златото се тргуваше под нивото од 4.450 долари за унца, во недела обележана со нови тензии на Блискиот Исток и ескалација на безбедносните ризици во регионот. Дополнителна неизвесност внесе и одбивањето на Хезболах да го прифати примирјето меѓу Израел и Либан, посредувано од Соединетите Американски Држави.
Тензиите се продлабочија по нападите со ракети и беспилотни летала врз Кувајт и Бахреин, како и по американската акција против танкер што пловел кон Иран.
Иако минатата недела се чинеше дека преговорите за ставање крај на конфликтот се приближуваат до решение, разговорите повторно западнаа во застој. Американскиот претседател Доналд Трамп изјави дека процесот се наоѓа во „завршна фаза“, додека иранскиот министер за надворешни работи, Абас Арагчи, оцени дека сè уште нема конкретен напредок.
Четиримесечниот конфликт сериозно ги наруши енергетските текови преку Ормутскиот теснец, што доведе до раст на цените на нафтата и нови стравувања од глобална инфлација. Аналитичарите предупредуваат дека ваквата состојба може да ги натера централните банки подолго да ги задржат високите каматни стапки или дури дополнително да ги зголемат, што традиционално негативно влијае врз цената на златото.
„Ризикот од енергетски шок значи поскапи пари, а тоа претставува товар за златото“, изјави Николас Фрапел, глобален директор за институционални пазари во рафинеријата АБЦ.
Според него, техничките показатели покажуваат дека трендот на златото останува негативен и на дневните и на четиричасовните графикони.
Откако конфликтот започна кон крајот на февруари, цената на благородниот метал бележи значителен пад и моментално е околу 16 проценти под нивото пред почетокот на војната.
Во меѓувреме, претседателката на Федералната резервна банка на Сан Франциско, Мери Дејли, порача дека економската неизвесност во САД останува висока и дека е прерано за појасни сигнали околу идното движење на каматните стапки.
Освен златото, пад забележаа и другите благородни метали. Среброто ослабна за 1,6 проценти и се тргуваше по цена од 72,70 долари за унца, додека платината и паладиумот исто така беа во негатива.
