„Зошто и по шест недели по труењето во Гостивар, извештај за водата не се објавува?“, велат од СДСМ

Шест недели по труењето во Гостивар, СДСМ преку соопштение бара од надлежните институции да го објават целосниот извештај за состојбата со водата за пиење, како и сите направени анализи и документација поврзана со случајот.

Од опозициската партија посочуваат дека во текот на кризата повеќе од 5.000 граѓани побарале медицинска помош, но и натаму, како што велат, јавноста нема увид во целосните резултати од испитувањата на водата.

— реклама —

СДСМ прашува зошто граѓаните не можат да ги видат резултатите, анализите и целосниот извештај и оценува дека, доколку нема што да се крие, документацијата треба да биде јавно објавена.

Партијата потсетува дека министерот за здравство Сашко Клековски најавил оти на 20 август ќе биде објавен епидемиолошки извештај, но прашува каде е целосниот документ и зошто досега биле објавувани само делови од документацијата.

Од СДСМ посочуваат и на различните информации што граѓаните ги добивале во текот на кризата. На почетокот водата била прогласена за небезбедна за пиење, по што било соопштено дека може да се користи само за технички намени.

— реклама —

Потоа било спроведено хиперхлорирање, а дополнително било соопштено дека во водата се пронајдени бактерии. Според СДСМ, ваквите различни информации создале дополнителна несигурност кај граѓаните.

Од партијата реагираат и на моментот кога, по завршувањето на кризата, највисоки владини функционери пред камерите пиеле вода и уверувале дека таа повторно е безбедна за употреба.

— реклама —

Сепак, според СДСМ, и по тоа не биле објавени целосните резултати од анализите врз основа на кои било донесено решението водата повторно да се користи за пиење.

„Каде е целосниот извештај за водата во Гостивар? Кој донел одлука водата повторно да биде пуштена за пиење и врз основа на кои резултати? Кој со име, презиме и потпис гарантира дека водата е безбедна?“, прашуваат од СДСМ.

Од опозициската партија оценуваат дека целата документација треба да биде достапна за јавноста за да се утврди што точно се случило и кој носел одлуки за време на кризата.

СДСМ ги повикува премиерот Христијан Мицкоски и министерот Клековски да ги објават целосниот извештај, сите анализи и документацијата со потписите на одговорните лица.

„Мицкоски и Клековски имаат обврска кон граѓаните на Гостивар да ја објават целата вистина“, наведуваат од СДСМ.