Зошто „Патриот“ е клучен за одбраната на Украина од руските ракети?

Руските балистички ракети се меѓу најтешките закани за украинската противвоздушна одбрана, бидејќи од нивното лансирање до ударот минуваат само неколку минути, а понекогаш и само неколку секунди за реакција.

— реклама —

За разлика од крстосувачките ракети, кои летаат на помала височина како беспилотни летала, балистичките ракети се искачуваат високо во атмосферата, а потоа со повеќекратна брзина од звукот стрмно се уриваат кон целта. Поради тоа, Украина тврди дека единствениот систем што сигурно може да ги пресретне е американскиот „Патриот“.

Главното руско балистичко оружје е ракетата „Искандер-М“, а Москва користи и хиперсонични ракети „Кинжал“, како и ракети од системите С-300 и С-400, кои првично биле наменети за противвоздушна одбрана, но се користат и за напади врз копнени цели.

— реклама —

Системот „Патриот“ мора за неколку минути да ја открие ракетата, да ја пресмета нејзината траекторија и да лансира пресретнувач, а во последната фаза понекогаш има само неколку секунди за реакција.

— реклама —

Украина, сепак, нема доволно батерии „Патриот“ ниту доволно ракети-пресретнувачи за да ги заштити сите поголеми градови. Русија дополнително ја оптоварува одбраната со истовремено лансирање балистички и крстосувачки ракети, беспилотни летала и мамки, принудувајќи ја Украина внимателно да ги троши скапите пресретнувачи.

Недостигот од ракети дополнително се влошил поради американско-израелскиот конфликт со Иран, во кој биле потрошени големи количества ракети за системите „Патриот“ и THAAD. Според проценките на „Асошиејтед прес“, американските резерви на ракети за „Патриот“ се намалиле за најмалку 65 проценти во споредба со периодот пред конфликтот, иако Пентагон тврди дека и понатаму располага со значителни залихи.

Во меѓувреме, Украина работи на развој на сопствен систем за пресретнување балистички ракети, наречен „Фреја“, кој би требало да ја намали зависноста од „Патриот“. Киев, заедно со девет европски земји, веќе формираше коалиција за развој на заедничка противракетна одбрана, но новиот систем сè уште е во развој и не е познато кога ќе стане оперативен.