СДСМ преку соопштение обвини дека 11 недели по случајот со водата во Гостивар сè уште нема објавен извештај, одговори ниту утврдена одговорност. Од партијата велат дека дополнителен проблем претставува информацијата дека во околу 50 населени места ширум Македонија водата не била исправна за пиење.
Во партиското соопштение се поставува и прашањето за загадувањето на реките Лепенец и Вардар, за кое, како што велат од СДСМ, јавноста сè уште нема добиено одговори.
СДСМ ја критикува Владата и поради планирањето на нови рударски проекти преку Нацрт-просторниот план. Од партијата наведуваат дека се опфатени Иловица–Штука, Казандол, Плавица, Кадиица и Луке, како и геолошки ископи на планината Кожув.
Во реакцијата посебно се посочува планирањето на рудник за антимон. Од СДСМ тврдат дека отпадот од рударските активности може да претставува ризик за почвата, водата и земјоделските површини, а антимонот го поврзуваат со употребата во воената индустрија.
Партијата го отвора и прашањето за изградбата на центри за податоци. Според СДСМ, компанија веќе објавила дека добила пристап до 100 мегавати електрична енергија и до реката Вардар.
Од СДСМ обвинуваат дека ваквите политики ги ставаат водата и земјиштето во ризик и тврдат дека приоритет се, како што наведуваат, „бизнис интересите, провизиите и профитите“.
Партијата бара стопирање на Нацрт-просторниот план и најавува дека ќе се спротивстави на, како што ја нарекува, „распродажба“ на природните ресурси.
„Македонија не е на продажба“, порача СДСМ.
