(Видео) „На 13 ноември Скопје беше ослободено, а денеска е заробено од криминална власт“, вели Давчевски

По повод одбележувањето на 13 Ноември – Денот на ослободувањето на Скопје, претседателот на Градската организација на СДСМ, Александар Давчевски, ја критикуваше работата на градоначалникот Орце Ѓорѓиевски, обвинувајќи дека градот наместо да напредува, се соочува со нефункционалност, сообраќаен хаос, отпад и диви депонии.

Давчевски оцени дека првата година од мандатот на Ѓорѓиевски ја одбележале лошото функционирање на градот, нередовниот јавен превоз и проблемите со хигиената. Според него, и покрај поставувањето на 3.300 нови контејнери, Скопје не е почисто, бидејќи отпадот не се собира редовно, а дивите депонии повторно се појавуваат.

— реклама —

Тој посочи дека граѓаните сè уште чекаат редовен јавен превоз, додека најавите за нови автобуси и дигитални решенија не се реализираат. Дополнително, како проблем го посочи повторното одложување на проектот за брз автобуски превоз (БРТ), за кој, како што рече, се обезбедени 70 милиони евра.

— реклама —

Давчевски предупреди и на поплавени улици и сообраќаен метеж по обилни врнежи, запуштени паркови и јавни површини, како и недоволна контрола на загадувачите. Тој праша каде се 346-те проекти со кои, според него, ВМРО-ДПМНЕ ја барала довербата од скопјани, посочувајќи дека ветените булевари, катни гаражи и инфраструктурни решенија сè уште не се реализирани.

Претставникот на СДСМ ја обвини ВМРО-ДПМНЕ дека претходно го блокирала функционирањето на градот преку Советот, а сега градоначалникот се претставува како реализатор на инфраструктурни проекти започнати од претходната градска власт. Како примери ги наведе мостовите „Михајло Апостолски“ и „Љубљанска“, како и булеварот „Борис Трајковски“.

— реклама —

Според Давчевски, на Скопје му се потребни чисти улици, редовен јавен превоз, проодна сообраќајна инфраструктура, уредени паркови и реализација на ветените проекти, наместо нови најави и оправдувања.

— реклама —

„Градоначалничката функција не е привилегија за политичка себепромоција, туку одговорност за функционирањето на градот“, порача Давчевски.