На територијата на земјава до 13 часот денеска се регистрирани 12 пожари на отворен простор, од кои четири се активни, седум се ставени под контрола, а еден е целосно изгаснат, информира Центарот за управување со кризи.
Активни пожари има во Општина Сарај, во реонот на селата Копаница и Радуша, каде гори нискостеблеста шума и ниска вегетација. Пожар е активен и во Штипско, меѓу селата Селце, Пухче, Степанци и Лакавица, каде е зафатена ниска вегетација.
Во Струшко активен е пожарот во реонот на селата Пискупштина, Луково и Буринец, каде гори шума. Активен пожар има и во Долнени, во близина на селото Лажани, каде е зафатена ниска вегетација.
Под контрола се пожарите во Македонски Брод, Зелениково, Ново Село, Виница, Делчево и Боговиње. Во Македонски Брод пожари има во реоните на селата Битово, Заград и Страјане, како и кај Драгов Дол. Пожар е ставен под контрола и над селото Палиград во Зелениково, кај селото Стиник во Ново Село, кај селото Градец во Виница, на градската депонија Острец во Делчево и кај селото Јеловјане во Боговиње.
Целосно е изгаснат пожарот кај селото Бузалково во Општина Велес, каде горело стрниште.
Од ЦУК продолжуваат да ја следат состојбата на теренот и координацијата со надлежните служби за справување со пожарите.
