Тепачката во Чаир, во која со нож беа повредени три лица, добива нови детали. Полицијата привела 19-годишник и 13-годишник од Скопје, кои се поврзуваат со инцидентот што се случил во понеделникот вечерта.
Според информациите од МВР, на 31 август околу 22 часот на подрачјето на Чаир избила физичка пресметка меѓу две лица од една страна и 19-годишниот И.З., 13-годишник и 16-годишник од друга страна.
Во текот на пресметката, 13-годишникот, кој е приведен, употребил нож и им нанел убодни рани на тројцата од спротивната страна. И.З. и 13-годишникот се здобиле со тешки телесни повреди, додека 16-годишникот поминал со телесна повреда.
Полицијата извршила увид на местото, при што биле одземени три ножа, пендрек и други предмети кои можат да бидат важни за истрагата.
Двајцата приведени се задржани за понатамошна постапка, а по целосното документирање на случајот, МВР најавува поднесување кривична пријава до Основното јавно обвинителство Скопје.
Министерот за здравство Сашо Клековски денеска ја потврди сериозноста на состојбата, посочувајќи дека медицинските тимови ги преземаат сите можни мерки.
„Убод во срце, критично е. Нашите мисли се со него, но веќе медицината нема многу што може да направи“, изјави Клековски.
