Основното јавно обвинителство Скопје отвори истрага против 19-годишник поврзан со насилниот инцидент во Чаир, во кој со нож беа повредени три лица, а за осомничениот е побарана и мерка притвор.
Од Обвинителството информираат дека постои сомнение дека 19-годишникот сторил кривично дело „насилство“ по член 386 од Кривичниот законик.
Според обвинителската верзија, осомничениот и неговиот малолетен брат, кој е под законската граница за кривична одговорност, презеле насилни дејствија при што на едно дете и на едно полнолетно лице им биле нанесени тешки телесни повреди со убоди од нож, додека уште едно дете било полесно повредено.
Од ОЈО наведуваат дека со нивното однесување кај присутните и во јавноста било предизвикано чувство на несигурност, загрозување, страв и вознемиреност.
Јавниот обвинител до судијата на претходна постапка доставил предлог за определување притвор за 19-годишниот осомничен.
Инцидентот се случи на 31 август околу 22 часот на подрачјето на Чаир, каде избила физичка пресметка меѓу повеќе лица.
МВР претходно информираше дека во пресметката учествувале две лица од една страна, а 19-годишниот И.З., 13-годишник и 16-годишник од друга страна.
Според полициските информации, токму 13-годишникот употребил нож и им нанел убодни рани на тројцата од спротивната страна.
При увидот на местото биле одземени три ножа, пендрек и други предмети кои може да бидат значајни за истрагата.
Министерот за здравство Сашо Клековски денеска изјави дека едно од повредените лица е во критична состојба поради убод во пределот на срцето.
„Убод во срце, критично е. Нашите мисли се со него, но веќе медицината нема многу што може да направи“, рече Клековски.
Истрагата сега треба да ги утврди сите околности на инцидентот, улогата на секое од лицата и точниот тек на пресметката.
