Девет пожари на отворен простор се активни во повеќе делови од земјава, покажуваат последните информации на Центарот за управување со кризи до 13:00 часот денеска.
Од вкупно 13 регистрирани пожари, девет се активни, два се ставени под контрола, додека два се целосно изгаснати.
Активни пожари има во општините Студеничани, Новаци, Крива Паланка, Могила, Велес, Македонски Брод, Битола, Прилеп и Струга.
Во Студеничани пожарот е над селата Моране, Вртекица и Рамни Габер, каде гори мешана шума. Активни се и пожарите кај селото Маково во Новаци, кај Муждивњак во Крива Паланка, во атарот на Лозани во Могила и кај селото Сливник во Велес.
Пожар е активен и кај Драгов Дол во Македонски Брод, на магистралниот пат Прилеп-Битола, каде се зафатени ниска вегетација и викендичка, кај старата фабрика „Партизанка“ во Прилеп и кај селото Долно Татеши во Струга.
Под контрола се пожарите на градската депонија во Делчево и кај селото Манастирско Доленци во Кичево.
Во текот на денот се изгаснати пожарите кај Старо Балдовци во Босилово и кај Копанце во Јегуновце.
