15-годишник со остар предмет нападна тројца вработени во училиште во Полска, едно лице почина

Петнаесетгодишен поранешен ученик нападнал тројца вработени со остар предмет во училиште во местото Лешчидул-Новињи, во близина на Вишков, Полска. Една од нападнатите лица починала, а осомничениот е уапсен, соопшти мазовјечката полиција, пренесува TVN24.

— реклама —

Починала 37-годишна вработена во училиштето, која според полицијата била првата нападната. И покрај долгата реанимација, лекарите не успеале да ја спасат.

Директорот на училиштето, откако слушнал викање, дошол да помогне, а во обидот да го совлада напаѓачот му помогнала и една наставничка. Двајцата биле повредени, но според полицијата се надвор од животна опасност. Мотивот за нападот засега не е познат.

— реклама —

Нападот во близина на Вишков се случил само еден ден по инцидент во Средното стручно училиште број 4 во Остроленка, каде што 19-годишник со нож нападнал повеќе лица. Девет лица биле повредени – пет ученици, двајца наставници и две лица кои се нашле во училиштето. Никој од нив не е во животна опасност, а осомничениот бил веднаш уапсен.

— реклама —

Во меѓувреме, полицијата спречила можен напад и во училиште во Сјерпц. Таму бил уапсен 17-годишник, откако ученици пријавиле дека најавувал дека на 7 октомври ќе направи нешто лошо во училиштето.

Полицајците го пронашле во неговиот дом неколку часа по пријавата и при претресот одзеле два ножа и мобилен телефон. Со проверка на телефонот било утврдено дека пребарувал информации поврзани со планираниот напад.

— реклама —

Седумнаесетгодишникот е задржан во полициските простории во Сјерпц, а истрагата и разговорите со сведоци продолжуваат.