Хонгконшките власти најавија формирање независно истражно тело предводено од судија, со цел да се утврдат причините за катастрофалниот пожар во станбениот комплекс „Ванг Фук Корт“, во кој загинаа најмалку 151 лице – најголема ваква трагедија во градот во последните неколку децении.
Телата на жртвите биле пронајдени на скалиштата и покривите на зградите додека жителите очајно се обидувале да избегаат од пламените јазици.
Полицијата уапсила 13 лица под сомнение за убиство од небрежност, а дополнителни 12 лица се приведени во антикорупциска истрага поврзана со обновата на комплексот. Засега не е познато дали уапсените лица се преклопуваат, пренесува „Ројтерс“.
Според првичните информации, пластична мрежа и изолациска пена користени за време на градежните работи овозможиле пожарот да се прошири со огромна брзина низ седумте високи кули на комплексот, каде живеат повеќе од 4.000 луѓе.
Тестирањата покажале дека дел од материјалите не ги исполнувале противпожарните стандарди, а дел од опремата бил намерно скриен од инспекциските служби, изјави главниот секретар Ерик Чен.
Жителите уште во септември 2024 година предупредувале дека се користат високо запаливи материјали, но властите тогаш одговориле дека ризикот е „релативно низок“, соопшти Министерството за труд.
Властите потврдија дека противпожарните аларми во дел од зградите не функционирале исправно, што значително го отежнало навременото предупредување и евакуација.
Изолациската пена, според експертите, дополнително придонела за брзото ширење на огнот.
По барањата за поголема транспарентност од граѓански организации, полицијата привела студент под сомнение за „поттикнување бунт“, а уште две лица се под истрага. Полицијата не ги коментира случаите.
„Нема да толерирам злоупотреба на трагедијата за извршување кривични дела,“ изјави лидерот на извршната власт Џон Ли.
Од меѓународните организации за човекови права реагираа спротивно.
„Критичките гласови не смеат да бидат криминализирани,“ порача Илејн Пирсон од Human Rights Watch.
Кинескиот кабинет за национална безбедност предупреди дека трагедијата не смее да се користи за „враќање на Хонгконг во хаос“ како во 2019 година, за време на масовните продемократски протести.
И покрај трагедијата, локалните избори закажани за недела ќе се одржат според планот. Аналитичарите велат дека исходот може да биде показател за јавниот однос кон управувањето со кризата.
Потрагата по исчезнатите продолжува – се смета дека околу 30 лица сè уште не се пронајдени. Двата најтешко оштетени кули не се целосно пребарани, а властите предупредуваат дека операцијата може да трае со недели.
Фотографиите од местото на несреќата прикажуваат истражители во заштитни одела како влегуваат во опожарени станови со целосно уништена внатрешност. Според SPCA Hong Kong, во пожарот загинале повеќе од 60 домашни миленици, а околу 200 се спасени.
Околу 1.500 жители се преселени од прифатните центри во привремен сместувачки капацитети, а дополнителни 945 луѓе се сместени во хостели и хотели. Властите обезбедиле итна еднократна финансиска помош од 10.000 хонгконшки долари (околу 1.180 евра) по домаќинство, како и забрзано издавање нови лични документи.
