Левица преку соопштение реагира на информацијата дека 18 македонски млади кик-боксери и тројца тренери ќе учествуваат на Светското WAKO првенство за деца, кадети и јуниори во Лидо ди Јесоло, Италија, со трошоци обезбедени преку самофинансирање.
Од партијата посочуваат дека станува збор за најбројната македонска јуниорска кик-бокс репрезентација која досега настапила на официјално Светско првенство. Според нив, наместо државата да обезбеди услови за настап, Кикбокс маитаи федерацијата морала да се потпре на самофинансирање.
Претседателот на Федерацијата и селектор Дејан Митровски – Урко, според Левица, посочил дека и покрај поднесените барања за финансиска поддршка, до почетокот на септември не биле добиени наменски средства од Министерството за спорт, ниту одговор на доставените барања.
Левица прашува зошто, како што наведуваат, не била обезбедена финансиска поддршка за настапот на националната репрезентација, особено имајќи предвид дека Министерството за спорт е институцијата надлежна за оваа област.
Од партијата потсетуваат и на амандманот што нивните пратеници го предложиле во јули при донесувањето на Ребалансот на Буџетот, а со кој, како што наведуваат, се предвидувало целосно покривање на трошоците на спортистите. Левица го прашува ДПМНЕ зошто амандманот бил одбиен, ако Министерството за спорт не обезбедува финансиска помош за настапот на младите репрезентативци.
Од Левица го отвораат и прашањето за изјавите на министерот за спорт Борко Ристовски. Тие посочуваат дека Министерството годинава соопштило оти за македонскиот спорт се обезбедени 438 милиони денари, а Ристовски во повеќе наврати изјавувал дека поддршката ќе се насочува според спортските резултати.
Како пример ја посочуваат неговата изјава од август, кога на прес-конференцијата за Струшкиот ракометен турнир порача дека Министерството ќе стои зад турнирите, федерациите, клубовите и поединците кои создаваат успех.
Токму затоа, Левица прашува што треба да направи една младинска национална репрезентација повеќе од тоа да избори настап на Светско првенство за да добие навремена институционална поддршка.
Од партијата додаваат дека спортската политика не треба да се сведува само на поддршка откако ќе биде освоен медал. Според нив, за создавање спортски резултат се потребни подготовки, тренери, патувања, сместување, котизации и услови за настап, а доколку државата го поддржува само веќе постигнатиот успех, товарот паѓа врз спортистите, нивните семејства, клубовите и федерациите.
Левица на крајот го обвинува ДПМНЕ за, како што наведуваат, декларативен патриотизам и тврди дека спортистите кои го претставуваат македонското знаме и Македонија се оставени сами да ги покриваат трошоците за настап.
