18 пожари на отворено до 13 часот, осум и натаму активни

Во Македонија до 13 часот денеска се регистрирани вкупно 18 пожари на отворен простор, од кои осум се активни, пет се под контрола, а пет се целосно изгаснати, информира Центарот за управување со кризи (ЦУК).

— реклама —

Активни пожари има во осум општини. Во Општина Ѓорче Петров гори во реонот на Грачани и Никитане, а пожарот е активен и на територијата на Косово, каде што зафатил шума.

— реклама —

Пожар има и кај Рамно, во Општина Чучер-Сандево, каде што гори мешана шума. Во Петровец е активен пожар на улица „1“, каде што гори трска и ниска вегетација, додека во Гази Баба пожарот е во близина на трговскиот центар „East Gate Mall“ и зафатил ниска вегетација.

Во Општина Македонски Брод активен е пожарот кај Белица, во месноста Кајорец, кон Брезница кај репетиторот, каде што гори нискостеблеста и мешана шума. Пожари има и во Стиниќ, Општина Ново Село, каде што гори мешана шума и ниска вегетација, во Милетино, Општина Брвеница, каде што гори ниска вегетација и грмушки, како и во Слупчане, Општина Липково, каде што гори ниска вегетација и стрниште.

— реклама —

Под контрола се пет пожари – во Буринец, Локов и Селци во Општина Струга, во Кнежино и Добреноец и кај Тајмиште во Општина Кичево, во Копаница во Општина Сарај и на градската депонија во Делчево.

— реклама —

Во текот на денот се изгаснати пет пожари. Тие биле регистрирани кај дивите депонии во Слатино и Непроштено, Теарце, на депонијата во Кратово, во месноста Периовец кај Ратево, Берово, каде што горела борова шума, како и во Октиси, Струга, каде што била зафатена ниска вегетација и грмушки.