Членката на Извршниот одбор на СДСМ, Рената Младеновска, на денешната прес-конференција упати критики до Владата, оценувајќи дека по две години од мандатот на премиерот Христијан Мицкоски, состојбата во здравствениот систем е сериозно влошена.
Според Младеновска, ниту едно од клучните ветувања во здравството не е реализирано, а граѓаните, наместо ефикасен и функционален систем, добиле хаос и институционална неодговорност.
Од СДСМ посочуваат дека не е реализирано ветувањето за интегриран Универзитетски клинички центар „Мајка Тереза“, ниту, како што велат, се реализирани најавените нови вработувања во здравствениот сектор.
„Беа ветени 500 нови вработувања во првите 100 дена, како и дополнителни вработувања на дефицитарен медицински кадар, но по две години нема реализација на овие ветувања“, истакна Младеновска.
Таа посочи и дека не се реализирани ветувањата за набавка на нови возила за Итната медицинска помош, воведување дневни болници и спроведување на целосна дигитализација на здравствениот систем.
Од опозициската партија оценуваат дека во здравството постои недостиг од медицински кадар, несоодветни услови за работа и проблеми со обезбедување на лекови и здравствени услуги.
Младеновска изрази загриженост и за состојбите на Клиниката за детски болести, посочувајќи дека, според СДСМ, актуелната состојба претставува дополнителен показател за кризата во здравствениот систем.
Од СДСМ сметаат дека Владата нема јасен план за развој на здравството и дека граѓаните ја плаќаат цената на, како што велат, неисполнетите ветувања и недостигот од реформи.
