На денешната прес-конференција, членката на Извршниот одбор на СДСМ, Рената Младеновска побара оставка од министерот за здравство Сашо Клековски, оценувајќи дека неговата изјава оти „црвените светла“ во Гостивар се запалиле предоцна претставува признание дека институциите задоцниле со реакцијата.
Младеновска изјави дека признанието, според партијата, ја потврдува одговорноста на Владата за состојбата во Гостивар, каде што, како што наведе, повеќе од 4.000 граѓани побарале лекарска помош.
Од СДСМ тврдат дека реакцијата на надлежните институции била задоцнета и посочуваат дека жителите на Гостивар со денови користеле загадена вода, додека институциите не презеле навремени мерки.
Партијата го отвори и прашањето за квалитетот на водата во Болницата за белодробни заболувања во Лешок. Според СДСМ, анализата ја изработил Центарот за јавно здравје – Тетово во рамки на Националната годишна програма и резултатите биле доставени до Министерството за здравство и до Агенцијата за храна и ветеринарство.
Од СДСМ прашуваат дали надлежните институции постапиле по добиените резултати, дали биле известени пациентите и персоналот и дали биле преземени мерки за нивна заштита.
Партијата оценува дека изјавите на министерот Клековски не ја намалуваат одговорноста и бара целосно утврдување на одговорноста, оставка од министерот за здравство Сашо Клековски, како и од директорката на Државниот санитарен и здравствен инспекторат Ирина Андоновска и директорот на Институтот за јавно здравје Александар Миланов. Дополнително, СДСМ повикува на итни контроли и анализи на квалитетот на водата во целата држава.
