20 пожари на отворено во Македонија, осум сè уште активни

Во Македонија во моментов се регистрирани 20 пожари на отворен простор, од кои осум се активни, три се ставени под контрола, а девет се целосно изгаснати, соопшти Центарот за управување со кризи (ЦУК).

Според податоците за состојбата заклучно со 18 часот на 28 август, активни пожари има во повеќе општини низ земјава.

— реклама —

Во Општина Сарај гори во селото Копаница, каде што е зафатена ниска вегетација. Пожар е активен и на подрачјето меѓу селото Трново во Општина Гостивар и селата Битово, Заград и Страјане во Општина Македонски Брод, каде што гори нискостеблеста шума, ниска вегетација, пасишта и папрат.

— реклама —

Во Општина Чашка активен е пожарот над селото Нежилово, во месноста Сватови, каде што гори ниска вегетација и поединечни дрвја. Пожар има и во селото Копанце во Општина Јегуновце, каде што е зафатена мешана шума.

Во Прилеп активни се три пожари – над касарната, каде што гори дива депонија и ниска вегетација, кај Старите гробишта, каде што е зафатена ниска вегетација, како и во селото Црнилиште.

— реклама —

Активен пожар е регистриран и на подрачјето меѓу селата Велмеј и Брежани во Општина Охрид, каде што гори отпад и ниска вегетација.

— реклама —

Три пожари се ставени под контрола. Во Општина Делчево има пожар на депонија, како и во селото Црквенец, каде што гори ниска вегетација. Под контрола е и пожарот на подрачјето меѓу селата Моране, Вртекица и Рамни Габер во Општина Студеничани, со крак кон селото Палиград, над селата Вражале и Тисовица во Општина Зелениково, каде што е зафатена мешана шума.

Во текот на денот се изгаснати девет пожари. Тие биле регистрирани во селата Банско и Чанаклија во Општина Струмица, Будинарци во Општина Берово, Милетино во Општина Брвеница, Дворци во Општина Пласница, Девич во Општина Македонски Брод, на булеварот „Македонска бригада“ во Општина Бутел и во селото Паниќари во Општина Сарај.