222 повредени во „Пулс“: Страшни изгореници, труења и скршеници – последиците по трагедијата се страшни трауми

Во катастрофалниот пожар во угостителскиот објект „Клуб Пулс“ во Кочани, покрај 63-цата загинати, дури 222 лица се здобиле со повреди, од кои 157 се со тешки телесни повреди, покажуваат официјалните податоци од обвинителниот акт.

Меѓу тешко повредените има и 20 деца, додека дополнително 65 лица се со полесни повреди, од кои три се деца. Обвинителството во судница детално ги чита повредите, кои според медицинските вештачења откриваат размери на трагедија со тешки последици по здравјето на преживеаните.

— реклама —

Најголем дел од повредените се со длабоки изгореници од втор и трет степен, зафаќајќи лице, глава, врат и екстремитети, а кај дел од нив изгорениците покриваат и до 30 проценти од телото.

— реклама —

Паралелно со пламените јазици, голем број од присутните вдишале токсични гасови, што довело до труење со јаглероден моноксид и сериозни оштетувања на дишните патишта. Дел од пациентите биле во критична состојба и ставени на механичка вентилација поради респираторна инсуфициенција.

Кај повеќе лица се регистрирани и оштетувања на видот, вклучително и ерозии на рожницата, како последица на високите температури и чадот.

— реклама —

Дополнителни тешки повреди се предизвикани од паниката и обидите за бегство, кога посетителите се насочиле кон единствен излез. Во стампедото се регистрирани бројни скршеници – на ребра, клучни коски и екстремитети, како и тешки нагмечувања на главата и градниот кош.

— реклама —

Медицинските извештаи бележат и раскинувања на лигаменти и тетиви, изместувања на зглобови и длабоки рани, што дополнително ја комплицира состојбата кај преживеаните.

Овие судско-медицински наоди се клучен дел од доказната постапка и ќе имаат значајна улога во утврдувањето на одговорноста за една од најтешките трагедии во поновата историја на земјата.