„2,4 милиони патници на македонските аеродроми за седум месеци, Македонија станува сe подобро поврзана со Европа и светот“, велат од ВМРО-ДПМНЕ

Повеќе од 2,4 милиони патници биле опслужени на двата македонски аеродроми во периодот од јануари до јули 2026 година, соопшти ВМРО-ДПМНЕ преку соопштение, оценувајќи дека бројките укажуваат на подобра поврзаност на земјата со европските и светските дестинации.

— реклама —

Според податоците што ги објави партијата, аеродромите во Скопје и Охрид во првите седум месеци опслужиле вкупно 2.414.892 патници, што е за 535.697 повеќе во споредба со истиот период во 2025 година.

— реклама —

Во истиот период биле реализирани 16.280 летови, односно 1.295 повеќе отколку во првите седум месеци од минатата година.

Растот бил особено изразен во јули. Скопскиот аеродром во текот на месецот опслужил 408.925 патници, што претставува зголемување од 29,5 отсто, додека преку охридскиот аеродром минале 52.544 патници, или 41,2 отсто повеќе во споредба со истиот период.

— реклама —

Од ВМРО-ДПМНЕ оценуваат дека зголемениот број патници значи и поголем број туристи и посетители, како и дополнителна работа за туристичкиот и услужниот сектор.

— реклама —

Од партијата велат дека резултатите се потврда за ефектите од владините политики насочени кон развој, инвестиции и подобра воздушна поврзаност на Македонија со Европа и светот.