Судскиот процес за трагичниот пожар во кочанската дискотека „Пулс“ продолжува со забрзано темпо, без досега да биде одложено ниту едно рочиште. Според најновите податоци од Основниот кривичен суд, досега се одржани вкупно 49 рочишта.
Од нив, девет биле одржани во 2025 година, додека во текот на 2026 година се одржани уште 40 рочишта. Податоците беа презентирани од претседателката на судот, Даниела Димовска.
Предметот е обемен и поради големиот број докази и лица опфатени со постапката. Досега биле изведени 1.309 материјални докази, а пред судот свои искази дале 45 сведоци и шест вешти лица, кои ги појаснувале техничките и безбедносните околности поврзани со случајот.
Одбраната на обвинетите предложила и дополнително сослушување на 244 сведоци, што укажува дека постапката ќе продолжи и во наредниот период.
До крајот на 2026 година се закажани уште 15 рочишта. Според планот на судот, последното рочиште за годинава е предвидено за 24 декември, по што процесот ќе продолжи во 2027 година.
Поради обемот на доказниот материјал, бројот на обвинети и предложените сведоци, судската постапка се очекува да продолжи и во текот на следната година.
