Група од 26 вработени поднесе тужба против компанијата „Мета“, тврдејќи дека при изборот на работници за масовните отпуштања биле користени системи потпомогнати од вештачка интелигенција, кои непропорционално ги погодиле лицата што користеле боледување, породилно, родителско или медицинско отсуство.
Тужбата е поднесена пред федерален суд во Калифорнија, непосредно пред планираното отпуштање на околу 8.000 вработени, што претставува околу десет проценти од работната сила на компанијата.
Според наводите, „Мета“ користела системи за рангирање што анализирале различни дигитални активности, меѓу кои користење на тастатура и глувче, комуникација, електронска пошта, историја на прелистување и други показатели за продуктивност. Тужителите тврдат дека алгоритмите не ги земале предвид законски одобрените отсуства, поради што тие биле оценети како помалку продуктивни и почесто избирани за отпуштање.
Меѓу тужителите има лица кои користеле породилно и родителско отсуство, како и вработени со здравствени проблеми и попреченост. Тие сметаат дека компанијата прекршила повеќе американски закони што ги штитат работниците од дискриминација.
Од „Мета“ ги отфрлија обвинувањата, наведувајќи дека одлуките за организациските промени ги носеле луѓе, а не системи со вештачка интелигенција.
Тужителите бараат судот привремено да ги запре отпуштањата, независна ревизија на системите за вештачка интелигенција и утврдување дали алгоритмите влијаеле врз изборот на вработените што останале без работа. Според нивните адвокати, случајот може да има далекусежно значење за идната употреба на вештачката интелигенција при управувањето со работната сила.
