Во изминатото деноноќие, до 07:30 часот на 18 август, во земјава се регистрирани 29 пожари на отворен простор, соопшти Центарот за управување со кризи. Од нив, шест се активни, еден е под контрола, а 22 се изгаснати.
Активни пожари има во општините Студеничани, Македонски Брод, Велес и Зелениково, Јегуновце и Сарај, Прилеп и Долнени.
Во Студеничани гори мешана шума на потегот Моране – Вртекица – Рамни Габер, додека во Македонски Брод пожарите се активни кај Видуш, Драгов Дол, Локвица и Девич, каде е зафатена ниска вегетација, нискостеблеста шума и грмушки.
Пожарот во Општините Велес и Зелениково се шири од С’лп и Горно Село кон Карабуниште, Бузалково, Добрино и Тисовица, при што гори ниска вегетација, дабова и габерова шума.
Активен пожар има и во Јегуновце и Сарај, на потегот Копанце – Туденце со проширување кон Бојане, како и во село Чаниште во Прилепско, каде се зафатени ниска вегетација и објекти. Во Долнени, активни се пожарите кај Вранче и Бело Поле.
Пожарот во Делчево, на депонијата, е ставен под контрола.
Во текот на изминатото деноноќие се изгаснати 22 пожари во повеќе општини, меѓу кои Студеничани, Битола, Крушево, Прилеп, Ресен, Валандово, Дојран, Охрид, Струга, Дебар, Росоман, Штип, Куманово, Кратово, Желино и Врапчиште.
