Вкупно 35 пожари на отворен простор се регистрирани во Македонија во периодот од 20 до 21 август, до 7:30 часот, информира Центарот за управување со кризи. Од нив, пет се активни, два се ставени под контрола, а 28 се целосно изгаснати.
Активни пожари има во Прилепско, Студеничанско, Македонски Брод, Кичевско и Липковско.
Во Општина Прилеп активен е пожарот кај селото Чаниште, со краци кон Крушевица, Лопатица, Дуње и кон Црна Река, каде гори ниска вегетација. Пожар има и на потегот Моране–Вртекица–Рамни Габер во Општина Студеничани, каде е зафатена мешана шума.
На подрачјето на Македонски Брод активни се пожари кај месноста Видуш, во близина на Драгов Дол и кај Локвица, каде гори ниска вегетација, нискостеблеста шума и грмушки.
Во Кичевско пожарот кај селото Тајмиште, во месноста Дарда, зафатил високостеблеста букова шума, додека во Општина Липково активен е пожарот кај Никуштак, каде гори ниска вегетација и шума.
Под контрола се пожарите кај селото Мојно во Општина Могила и на потегот Белушино–Јакреново во Крушевско.
Во изминатото деноноќие се изгаснати уште 28 пожари на отворен простор, меѓу кои и во Студеничани, Бутел, Гази Баба, Новаци, Струмица, Радовиш, Струга, Кичево, Велес, Кавадарци, Неготино, Лозово, Кочани, Куманово, Крива Паланка, Тетово и Гостивар.
