Австриските власти водат истрага за смртта на 40-годишна жена која, според обвинителството, починала од повреди што наводно биле последица на сексуално насилство. Се проверува и можноста во злоставувањето да учествувале и други мажи, а случајот во австриските медиуми веќе е спореден со познатиот случај на Французинката Жизел Пелико.
Жената, чиј идентитет не е објавен, била во состојба на „исклучителна омалаксаност и поради тоа беспомошна“, кога наводно била сексуално злоупотребена од нејзиниот сопруг. Обвинителството во Велс соопшти дека наводите за постоење поширока „мрежа на силувачи“ засега не можат да се потврдат, но истрагата продолжува.
Според обвинителството, жената на 26 јуни била пронајдена крвава и со тешки повреди во својот дом во Мархтренк, во близина на Велс, во Горна Австрија. Итната медицинска помош констатирала смрт на самото место, по што било наредено да се изврши обдукција.
Во рамките на истрагата се проверуваат наводи дека жената била сексуално злоупотребена од нејзиниот 51-годишен сопруг и од уште еден маж на иста возраст. Двајцата се во притвор, но обвинителството засега само сопругот го поврзува со дејствието што довело до смртта на жената.
Вториот осомничен го признал делото и изразил жалење, соопшти обвинителството. Против него се води истрага за два наводни случаи на сексуално злоставување на беспомошно лице или лице со намалена способност за расудување.
Сопругот, пак, одбил да ги коментира обвинувањата. Против него се води постапка поради сомнение за злоставување на беспомошно лице или лице со намалена способност за расудување со смртен исход. За ова кривично дело е предвидена затворска казна од 10 до 20 години, а во одредени околности и доживотен затвор.
Во зависност од тоа што ќе утврди истрагата за неговата намера, сопругот би можел да се соочи и со обвинение за убиство. Обвинителството наведува дека засега нема сознанија за парични трансакции меѓу сопругот и вториот маж кој се наоѓа во притвор.
Австриското обвинителство во Велс за CNN потврдило дека истрагата е во тек, но не соопштило дополнителни детали за наводните дејствија, повикувајќи се на почит кон жртвата и интересите на истрагата.
