Новата учебна година во Австрија започна со примена на закон со кој на девојчињата помлади од 14 години им се забранува носење верски марами во училиштата. Мерката важи и за државните и за приватните училишта низ целата земја и првенствено се однесува на муслиманските покривала за глава, како хиџабот.
Министерката за интеграција Клаудија Бауер од конзервативната Народна партија (ÖVP) оцени дека марамите се „знак на потчинетост и средство за контрола на девојчињата уште од најрана возраст“.
Поддржувачите на законот, кој го усвои владејачката коалиција составена од ÖVP, Социјалдемократската партија (SPÖ) и либералната партија NEOS, велат дека мерката претставува јасна определба за еднаквост меѓу половите и заштита на правата на малолетните девојчиња.
Критичарите, пак, предупредуваат дека забраната може да поттикне негативно расположение кон муслиманите и поставуваат прашање за нејзината уставност.
Исламската верска заедница во Австрија (IGGÖ) остро се спротивставува на законот. Карла Амина Багајати од организацијата изјавила дека со забраната неоправдано се ограничува основното право на верска слобода и дека мерката несразмерно ги погодува муслиманските девојчиња.
Од IGGÖ најавиле поддршка за правни постапки на девојчиња и нивните семејства кои сметаат дека им се нарушени основните права и сакаат случаите да ги изнесат пред Уставниот суд.
Токму Уставниот суд во 2020 година ја укина претходната забрана за носење марами во основните училишта, оценувајќи дека таа е спротивна на принципот на верска неутралност на австриската држава.
Според новите правила, наставниците треба да реагираат доколку забележат ученичка со марама. Предвидено е најпрво да се разговара со ученичката и со нејзините законски старатели. При повторување на прекршувањето, случајот може да биде пријавен до службата за заштита на децата, а како крајна мерка на старателите може да им биде изречена глоба до 800 евра.
Дел од наставниците изразиле загриженост поради обврската тие да ја спроведуваат забраната. Сиги Маурер од Зелените го обвинила министерот за образование Кристоф Видеркер од NEOS дека создава нови конфликти и им ги префрла на наставниците, кои и онака се под голем притисок.
Опозициската крајнодесничарска Слободaрска партија (FPÖ), пак, смета дека мерката не е доволно строга. Партијата бара целосна забрана на марами и покривала за лице во училиштата, и за учениците и за наставниците.
Австрискиот канцелар Кристијан Штокер, лидер на ÖVP, неодамна повика и на уставна забрана на политичкиот ислам. Во изјава за јавниот сервис ORF тој порача дека „не сака да живее во исламска држава“.
Австриската мерка се разликува од францускиот модел. Во Франција повеќе од две децении е забрането носење видливи верски обележја во училиштата, вклучително и марами, турбани и кипи.
Австрија, како и неколку други европски држави, меѓу кои Франција, Белгија и Данска, веќе има забрана за носење покривала што целосно го прикриваат лицето, како никаб или бурка, на јавни места.
