Можности за нови деловни партнерства и реализација на инфраструктурни проекти биле тема на дводневната деловна мисија на австриски компании во Скопје, која се одржа на 15 и 16 септември во организација на Трговското одделение при Амбасадата на Австрија.
Во мисијата учествувале десет австриски компании, кои оствариле средби со македонски компании, институции и претставници на политичкиот и деловниот сектор. Целта била да се разгледаат можностите за конкретна соработка, но и за воспоставување долгорочни деловни партнерства.
Компаниите од Австрија ја претставиле својата експертиза во повеќе области, меѓу кои производство на енергија, железничка и транспортна инфраструктура, инженерство, градежно советување, паметни технологии и одржлива мобилност.
На средбите се разговарало за можностите австриското техничко знаење и искуство да се поврзат со капацитетите на македонските компании и потребите за развој на инфраструктурата во земјата.
Во рамки на мисијата во Скопје била одржана и австриско-македонска деловна тркалезна маса. На неа учествувале заменик-премиерот и министер за транспорт Александар Николоски, министерката за енергетика, рударство и минерални суровини Сања Божиновска, претседателот на Стопанската комора Бранко Азески, градоначалникот на Скопје и претседател на ЗЕЛС Орце Ѓорѓиевски и заменик-директорот на претпријатието за железничка инфраструктура Шериф Абдулахи.
Според организаторите, разговорите покажале можност за продлабочување на соработката во развојот на современи, безбедни и одржливи инфраструктурни решенија.
Од Трговското одделение при Амбасадата на Австрија оценуваат дека австриската технологија и искуството во реализација на инфраструктурни проекти може да се поврзат со познавањето на локалниот пазар и капацитетите на македонските компании.
Деловната мисија овозможила воспоставување нови контакти и зајакнување на постојните деловни односи, со очекување тие во иднина да резултираат со конкретни проекти во транспортот, енергетиката и одржливата инфраструктура.
