40 пожари на отворено во изминатото деноноќие, шест сè уште активни

Вкупно 40 пожари на отворен простор се регистрирани на територијата на државата до 07:30 часот денеска, 14 август, соопшти Центарот за управување со кризи.

Од нив, шест пожари се активни, три се под контрола, додека 31 пожар е целосно изгаснат.

— реклама —

Активни пожари има во шест општини. Во Студеничани огнот е над селата Моране, Вртекица и Рамни Габер, каде што е зафатена мешана шума. Во Македонски Брод пожарот е во месноста Видуш, кај Драгов Дол, каде што гори ниска вегетација, нискостеблеста шума и грмушки.

— реклама —

Активен пожар има и во битолското село Лопатица, во Новаци на подрачјето на селата Маково, Мојно и Брник, кај Крушево на потегот Алданци–Норово, како и во велешкото село Слеп.

Под контрола се пожарите на градската депонија во Делчево, кај селата Лознани и Вашарејца во Могила и во селото Копанце во Јегуновце.

— реклама —

Во текот на изминатото деноноќие се изгаснати пожари на повеќе локации низ земјата, меѓу кои во Сарај, Прилеп, Крушево, Долнени, Ново Село, Василево, Охрид, Струга, Кичево, Чашка, Велес, Кавадарци, Куманово, Липково, Јегуновце, Тетово, Врапчиште и Гостивар.

— реклама —

Меѓу најпогодените подрачја биле Прилеп, каде што се регистрирани повеќе одделни пожари, како и Охрид и Струга. Во дел од случаите биле зафатени ниска вегетација, шума, стрништа, депонии, земјоделски површини и објекти.

Од ЦУК продолжуваат да ги следат состојбите на теренот и активностите за гаснење и целосно локализирање на пожарите.