Властите во Непал продолжуваат со потрагата по стотици исчезнати лица, додека соседна Индија презема превентивни мерки поради опасност од поплави предизвикани од надојдената река Гандак.
Според податоците на Туристичката управа на Непал, 403 лица и натаму се водат како исчезнати, од кои 341 се странски државјани. Меѓу исчезнатите има 203 мажи и 200 жени, а странските државјани доаѓаат од 26 земји.
Најголем број од исчезнатите странски државјани се од Индија – 133 лица. Следуваат САД со 47 и Велика Британија со 33 исчезнати лица. Според информациите што туристичките оператори ги доставиле до Туристичката управа, повеќето од патниците се упатувале кон Манасаровар, област во близина на индиско-непалската граница.
Во меѓувреме, властите во индиската сојузна држава Бихар, јужно од Непал, издадоа предупредување поради опасност од поплавување на реката Гандак и го повикаа населението на зголемена внимателност.
Премиерот на Бихар, Самрат Чаудхари, потврди дека во неколку области веќе се активирани мерки за подготвеност. Тие вклучуваат засилен надзор на насипите, ноќни патроли и распоредување тимови на службите за итна помош.
И Црвениот крст ги засили активностите во погоденото подрачје, а итни тимови се испраќаат во три области. Подготвен е и план за евакуација, кој ќе биде активиран доколку состојбата го наложи тоа.
Непалскиот премиер Балендра Шах во меѓувреме повика на единство и порача дека државата ги става сите расположливи ресурси во функција на спасувањето, лекувањето, обезбедувањето храна и сместување за населението погодено од катастрофата.
