Бројот на потврдени случаи на западнонилска треска во земјава достигна 43, а надлежните институции го прошируваат мониторингот и на подрачјата каде што се регистрирани нови случаи. Министерот за здраство, Сашо Клековски, информираше дека 40 случаи се дефинитивно потврдени, додека три се потврдени со еден тест.
Како што посочи Клековски, новина во однос на досегашната состојба е појавата на првите случаи во општините Центар и Чаир. Паралелно со тоа, започна и засилената контрола на птиците, откако во Скопје е пронајден гавран кај кој е потврдена западнонилска треска.
Клековски им се заблагодари на граѓаните кои пријавуваат пронајдени мртви птици. Тие ги собира Агенцијата за храна и ветеринарство, а добиените податоци се користат за дополнително утврдување на подрачјата со ризик од вирусот.
На состанокот со градоначалниците било разговарано за проширување на досегашните активности на Град Скопје и за утврдување на ризичните и високоризичните подрачја во скопскиот плански регион.
„Скопската котлина е една целина и треба да ја третираме како една“, посочи Клековски, додавајќи дека комарците не ги препознаваат општинските граници. Според него, нивниот радиус на движење е од еден до два километри, поради што мерките треба да ги опфатат и соседните општини.
Во моментов се идентификувани 34 ризични подрачја, од кои 13 се оценети како високоризични. Како главни критериуми за утврдување на ризикот се издвојуваат застоената вода и високото количество органска материја.
Меѓу високоризичните подрачја се каналите за наводнување во Скопско Поле, ископите исполнети со вода, мртвите делови од реките, како и повеќе канали во Арачиново, Бутел, Гази Баба, Илинден, Драчево, Батинци и Студеничани.
Дополнително, како потенцијално високоризични се идентификувани и подрачјата со голем број септички јами, гробиштата поради можноста за задржување вода во вазните, како и местата каде што несоодветно се складираат стари гуми.
Клековски предупреди дека ризикот не се создава само на големи и лесно забележливи површини. Застоена вода може да има и во мали садови, саксии, стари буриња со дождовница, расипани хидранти и други места во близина на домовите.
Според него, токму ваквите мали и тешко забележливи места може да претставуваат значаен дел од ризикот, поради што е потребна внимателност и од страна на граѓаните.
