Во Франција се регистрирани три случаи на зараза со вирусот на Западен Нил кај луѓе во департманот Лоара-Атлантик, на западот на земјата, соопшти француската Регионална здравствена агенција (АРС).
Од агенцијата предупредуваат дека појавата на автохтони случаи во регионот Пај де ла Лоар укажува на локална циркулација на вирусот и бара зголемено внимание од здравствените работници и населението.
Ова е првпат случај на зараза со вирусот на Западен Нил да биде регистриран во регионот Пај де ла Лоар. Според АРС, тоа укажува на локална циркулација на вирусот и потреба од засилен надзор и навремено откривање на нови случаи.
Првиот случај на зараза со вирусот во Франција бил откриен во текот на летото 2025 година во регионот Прованса-Алпи-Азурен Брег. Во текот на минатата година, во континенталниот дел на Франција биле регистрирани 62 случаи кај луѓе.
Вирусот на Западен Нил главно циркулира меѓу птиците, а кај луѓето се пренесува преку убод од заразен комарец од родот Culex, кој најчесто каса во текот на ноќта.
Во најголем дел од случаите заразените лица немаат симптоми. Кај дел од нив може да се појават симптоми слични на грип, како покачена температура, главоболка и болки во мускулите.
Во околу еден отсто од случаите може да се развијат тешки невролошки компликации, кои можат да остават трајни последици, а во најтешките случаи да завршат и со смртен исход.
