На денешната прес-конференција, пратеничката Марија Кузманоска соопшти дека е објавен вториот јавен повик во рамки на Оперативниот план за вработување за 2026 година, со кој се предвидени околу 5,4 милиони евра за поддршка на отворањето нови работни места.
Кузманоска истакна дека јавниот повик за финансиска „Поддршка за креирање на нови работни места“ е наменет за микро, мали и средни претпријатија, социјални претпријатија и граѓански организации.
Според неа, за мерката се обезбедени 332.650.000 денари, а целта е да се поттикне вработувањето и да се создадат нови работни места.
Кузманоска посочи дека една компанија ќе може да добие финансиска поддршка за вработување на најмногу пет лица, во износ од 800.000 до 1.250.000 денари, во зависност од целната група и бројот на одобрени вработувања.
Таа оцени дека мерката претставува можност за домашните компании да го прошират своето работење, да отворат нови работни места и да придонесат кон економскиот развој.
Од ВМРО-ДПМНЕ потсетуваат дека ова е вториот јавен повик од Оперативниот план за вработување за 2026 година, по претходниот повик за самовработување, кој беше наменет за лица што сакаат да започнат сопствен бизнис.
