69 отсто од Швајцарците поддржуваат забрана на огнометите

Швајцарските граѓани на 29 ноември ќе гласаат на референдум за забрана на бучните огномети. Иницијативата, покрената од организации за заштита на животните и животната средина, според првичните анкети има поддршка од 69 отсто од испитаниците, додека 29 отсто се против, објави „Еуроњуз“.

Предлогот има цел да ги заштити луѓето и животните од бучавата, загадувањето на воздухот, повредите и пожарите предизвикани од пиротехничките средства. Од швајцарската организација за заштита на животните „Швајцер Тиршутц“ порачуваат дека огнометите кај домашните и дивите животни предизвикуваат силен стрес.

— реклама —

Анкетата покажала дека забраната ја поддржуваат гласачи со различни политички определби. Поддршката е поголема кај жените и изнесува 76 отсто, наспроти 60 отсто кај мажите.

— реклама —

Предлогот не предвидува целосна забрана на пиротехниката, туку забрана за продажба и употреба на бучни огномети. Тивки алтернативи, како светлечките прачки и пиротехничките средства што исфрлаат искри, би останале дозволени. Кантоните би можеле да одобруваат исклучоци за големи јавни прослави, но поединците не би смееле да користат бучни огномети ниту во тие случаи.

Иницијативата е покрената во 2023 година и собрала повеќе од 137.000 потписи, над потребниот минимум од 100.000 за иницирање референдум во Швајцарија.

— реклама —

Противниците, меѓу кои се Швајцарската народна партија, партијата Центар и Швајцарското занаетчиско здружение, предупредуваат на загрозување на традицијата, ограничување на личните слободи и можни економски последици за бизнисите поврзани со пиротехниката.

Според податоците на швајцарските власти, огнометите годишно ослободуваат од 200 до 400 тони ситни честички во воздухот, што претставува околу два до три отсто од вкупните годишни емисии на овие честички во земјата. Тие можат да содржат штетни метали и да бидат особено опасни за луѓето со здравствени проблеми. Дополнително, пиротехниката го зголемува ризикот од пожари, особено при топло и суво време.

Доколку граѓаните ја поддржат забраната, Швајцарија би можела да го следи примерот на Холандија, која на 1 август годинава воведе национална забрана за потрошувачки огномети, со исклучоци за најслабите пиротехнички средства и одобрени организирани приредби.