Горниот дом на швајцарскиот парламент денеска гласаше за воведување данок од најмалку 2.000 франци за имиграција на работна сила од Европската Унија. Мерката би се активирала во рамките на новата заштитна клаузула предвидена во новиот пакет договори со ЕУ.
Според предлогот, данокот за вработените би го плаќале директно компаниите што ги вработуваат, додека возрасните членови на семејствата кои доаѓаат во Швајцарија преку семејно обединување би ги сноселе трошоците сами.
Законодавците предлагаат минималниот износ на надоместокот да биде меѓу 2.000 и 4.000 франци, а приходите собрани од данокот би се прераспределувале меѓу граѓаните на Швајцарија.
По активирањето на заштитната клаузула, данокот би се применувал и за граѓаните од трети земји.
Мерката би стапила на сила доколку Швајцарија се соочи со сериозни економски или социјални проблеми поради голем прилив на имигранти.
Според усвоениот предлог, Федералниот совет, односно швајцарската влада, ќе има обврска секоја година да ја анализира потребата од активирање на заштитната клаузула, објави швајцарскиот парламент на својата веб-страница.
Предлагачот на мерката смета дека данокот треба да ги охрабри швајцарските компании да вработуваат повеќе домашни работници, објавува „Свис инфо“.
Сепак, дел од политичарите од десниот центар од франкофонскиот дел на Швајцарија изразија сомнежи околу ефектите од мерката и предупредија дека таа би можела да донесе дополнителна администрација. Забелешки изрази и дел од левицата.
