Необичните траги што се појавиле на исушените полиња во Швајцарија ги натерале археолозите да ги преиспитаат досегашните карти на римскиот град Авентикум, некогашниот главен град на римска Хелвеција.
Археолозите во кантонот Во, по дојава од љубител на историјата, со дронови секојдневно ги снимале полињата околу локалитетот. Снимките откриле досега непознати или недоволно истражени траги од терми, куќи, патишта и можна храмска градба.
Според археолозите, станува збор за најзначајните откритија на локалитетот во последните 50 години. Новите наоди веќе се внесуваат во археолошките карти, при што се пополнуваат празнините и се коригираат дел од досегашните претпоставки за распоредот на античкиот град.
Причината за откривањето на остатоците е сушата. Кога почвата над закопаните градби има поинаква структура, растенијата над нив побрзо венеат, создавајќи видливи траги од воздухот. Слични појави годинава се забележани и на други места во Швајцарија и Европа.
Некои од откриените траги исчезнале по косењето и со падот на температурите, но дел од остатоците и понатаму се видливи на теренот поради продолженото топло време.
Авентикум бил основан пред околу 2.000 години, по римското освојување на регионот. Градот подоцна почнал постепено да пропаѓа со засилувањето на германските продори од третиот век.
Археолозите планираат да ги претстават откритијата пред колегите, а во иднина се можни и насочени археолошки ископувања.
