7 активни пожари низ државата

Вкупно 46 пожари на отворен простор се регистрирани во периодот од 5 до 6 октомври до 7:30 часот, информира Центарот за управување со кризи. Од нив, седум се активни, еден е ставен под контрола, а 38 се изгаснати.

Активни пожари има во седум општини. Во Дебар гори на местото „Над Боровите“, на краците кон селата Татар Елевци и Кораб и кон Бањиште, каде што е зафатена смрека, папрат и трнливи грмушки.

— реклама —

Пожар е активен и во селото Јаболчиште, на местото „Биков Гроб“ во општина Чашка, каде што гори шума и ниска вегетација, како и во селото Стрима во општина Липково, на местото „Гури Куќ“, со зафатена борова шума и ниска вегетација.

— реклама —

На Шар Планина, над Боговинско Езеро, активен е пожар на пасишта. Во општина Куманово гори на депонијата Краста, додека во општина Новаци пожарот е во селото Добровени, каде што е зафатена ниска вегетација и стрниште.

Активен пожар е регистриран и во општина Дебарца, на потегот меѓу селата Белчишта и Лешани, каде што гори ниска вегетација.

— реклама —

Под контрола е пожарот меѓу селата Драчевица и Цветово во општина Студеничани, на местото „Калдиред“, каде што е зафатена ниска вегетација.

— реклама —

Од вкупно 38 изгаснати пожари, повеќето биле на ниска вегетација, стрништа и депонии, а биле регистрирани и пожари во шума, грмушки и на места со насобран отпад. Пожари биле евидентирани во повеќе општини, меѓу кои Гостивар, Прилеп, Долнени, Гевгелија, Кочани, Тетово, Желино, Демир Капија, Кичево, Бутел, Сарај, Гази Баба, Куманово и други.

ЦУК продолжува да ја следи состојбата со пожарите на отворен простор и да известува за нивната состојба.