Шест пожари на отворен простор се регистрирани во Македонија до 13 часот денеска, од кои еден е активен, еден е ставен под контрола, а четири се изгаснати, информира Центарот за управување со кризи (ЦУК).
Активен е пожарот во селото Рашче, во Општина Сарај, каде гори сува трева.
Под контрола е пожарот што избувнал во селото Белица, на местото Кајорец во Општина Македонски Брод, а потоа се проширил кон Јасен во Општина Сопиште. Таму гори нискостеблеста и мешана шума.
Во текот на денот се изгаснати четири пожари. Во Општина Илинден пожарот кај Кадинска Петка на автопатот Скопје–Велес бил на сува трева. Во Куманово гореле сува трева и отпад во близина на касарната „Христијан Карпош“.
Пожар е регистриран и во селото Ногаевци во Општина Велес, каде горела сува трева, како и на подрачјето по Демир Капија, пред тунелите, исто така на сува трева.
