Активни пожари кај Драчевица, Дебар, Јаболчиште, Матејче, Стрима и на Шар Планина

До 7:30 часот утрово во земјава се регистрирани вкупно 60 пожари на отворен простор, од кои шест се активни, два се под контрола, а 52 се изгаснати, информира Центарот за управување со кризи (ЦУК).

Активни пожари има во општините Студеничани, Дебар, Чашка, Липково и Тетово. Во Студеничани пожарот е меѓу селата Драчевица и Цветово, во месноста Калдиред, каде гори ниска вегетација.

— реклама —

Во Дебар пожарот е во месноста Над Боровите, со краци кон селото Татар Елевци и Кораб и кон селото Бањиште, каде се зафатени смреки, папрат и трнливи грмушки.

— реклама —

Во општина Чашка активен е пожарот кај селото Јаболчиште, во месноста Биков Гроб, каде гори шума и ниска вегетација. Во Липково има два активни пожари – кај селото Матејче и кај селото Стрима, во борова шума.

Шестиот активен пожар е на Шар Планина, над Боговинското Езеро, каде гори пасиште.

— реклама —

Пожари под контрола има два – кај селото Џепиште во општина Центар Жупа, каде гори сува трева и нискостеблеста шумска вегетација, и кај селото Миравци во општина Гевгелија, каде е зафатена мешана шума.

— реклама —

Во текот на претходниот период се изгаснати 52 пожари на повеќе локации низ земјава. Тие зафатиле ниска вегетација, мешана и борова шума, стрништа, земјоделски остатоци, отпад и други површини.

Меѓу општините каде се регистрирани изгаснати пожари се Бутел, Гази Баба, Шуто Оризари, Аеродром, Зелениково, Сарај, Ѓорче Петров, Битола, Прилеп, Долнени, Кривогаштани, Струмица, Босилово, Валандово, Дебарца, Дебар, Кичево, Македонски Брод, Струга, Штип, Кочани, Виница, Куманово, Липково, Старо Нагоричане, Ранковце, Кратово, Брвеница, Желино, Гостивар и Врапчиште.