Седум пакувања со хашиш, со вкупна тежина од 700 грама, биле откриени во поштенска пратка од Шпанија наменета за македонски државјанин од Тетово.
Од Царинската управа информираат дека пратката, која пристигнала во Царинската испостава Пошти, била селектирана за детална контрола. При отворањето биле пронајдени неколку херметички затворени кеси во кои имало седум пакувања со зелена цврста материја.
По сомнежот дека станува збор за дрога, биле повикани тимови од Одделението за оперативни работи. Царинско куче детектирало присуство на дрога, по што со тестирање било потврдено присуство на ТХЦ.
Кога Р.В. ја подигнал пратката, бил приведен од инспектори од Одделението за истраги. Против него е поднесена кривична пријава до надлежното јавно обвинителство за неовластено производство и пуштање во промет на наркотични дроги, психотропни супстанции и прекурсори.
По налог на јавен обвинител, материјата била испратена на вештачење, при што било утврдено дека станува збор за хашиш. Дрогата е запленета.
Од Царинската управа посочуваат дека борбата против сериозниот криминал е меѓу нивните највисоки приоритети и најавуваат санкционирање на обидите за неовластено производство и пуштање во промет на наркотични дроги, психотропни супстанции и прекурсори.
