82 години од ослободувањето на Ѓорче Петров

Со положување цвеќе и оддавање почит на загинатите борци, Општина Ѓорче Петров денеска ја одбележа 82-годишнината од ослободувањето, 14 Ноември – датум кој симболизира слобода, храброст и пожртвуваност.

— реклама —

На свеченоста присуствуваа градоначалникот Александар Стојкоски, претседателката на Советот Бранкица Дуковски, членовите на Советот, претставници на делегации, вработени во општината и бројни граѓани. Со положување цвеќе и минута молчење им беше оддадена почит на борците и хероите кои ги положиле животите за слободата.

Посебно внимание привлече присуството на 97-годишниот Јован Манчевски, единствениот жив борец од тој период. Тој сподели спомени и сведоштва за борбата и ослободувањето, потсетувајќи на храброста и пожртвуваноста на генерациите кои ја извојувале слободата.

— реклама —

Градоначалникот Стојкоски во своето обраќање истакна дека 14 Ноември не е само историски датум, туку и потсетник за одговорноста на секоја генерација кон заедницата и иднината.

— реклама —

Тој нагласи дека слободата е највредното наследство од борците и дека денешната обврска е да се чува и надградува преку подобри услови за живот, современа инфраструктура, квалитетно образование, безбедни населби и еднакви можности за сите граѓани.

Стојкоски посочи дека вредноста на локалната самоуправа не се мери само преку реализираните проекти, туку и преку довербата, одговорноста и грижата за граѓаните.

— реклама —

Одбележувањето испрати порака дека слободата не треба да се зема здраво за готово, а историското наследство треба да се чува и да се надградува со работа, единство и одговорност.