960 кубни метри диво фрлен отпад исчистени за една недела во Скопје

ЈП „Комунална хигиена“-Скопје ги стави во употреба новите специјални комунални возила за собирање и транспорт на отпадот, како и за одржување на хигиената на јавните и сообраќајните површини. Возилата се обезбедени преку донација од Министерството за транспорт и врски и Градот Скопје.

— реклама —

Новиот возен парк вклучува камиони со зафатнина од 21, 17, 8 и 3 кубни метри, автоцистерни за машинско миење улици и специјализирани возила за машинско метење. Од претпријатието очекуваат нивната употреба да ја зголеми ефикасноста на работата на терен.

— реклама —

Паралелно продолжува и замената на садовите за комунален отпад, при што досега се заменети приближно 500 контејнери. Екипите вршат и рачно миење на локациите на кои се поставуваат новите садови.

Во текот на изминатата недела комуналните екипи отстраниле 960 кубни метри непрописно одложен кабаст и градежен отпад од јавните и сообраќајните површини во скопските општини. Најголемо количество, односно 210 кубни метри, било расчистено во општина Центар.

— реклама —

Во истиот период биле собрани и транспортирани 3.150 тони комунален отпад од домаќинствата и правните субјекти на територијата на Скопје.

Еко-патролата, пак, изготвила 23 записници за лица и правни субјекти затекнати при прекршување на Законот за јавна чистота. Од нив, 12 биле врачени на територијата на општина Чаир.