Германија предупредува за ситуацијата во Босна и Херцеговина
Германскиот Бундестаг донесе одлука за прераспоредување војници во мисијата ЕУФОР/Алтеа и усвои резолуција со предупредување за ситуацијата во Босна и Херцеговина.
Овие одлуки беа донесени со гласовите на владејачката СПД, Зелените и ФДП, како и унионистичката ЦДУ/ЦСУ.
Резолуцијата со наслов „Неопходно е да и се даде поддршка на Босна и Херцеговина на патот кон подобра иднина“ бара германската влада да биде повеќе вклучена во таа земја.
Во Резолуцијата се истакнува дека во БиХ има тензии и се нагласува дека ситуацијата е резултат на воените настани во 90-тите години и на нефункционалноста на државата веќе три децении.
Пратениците побараа од германската влада посилно ангажирање во БиХ за да се спречи понатамошен раст на тензиите и сепаратистичките тенденции.
Од германската влада се бара да се заложи во ЕУ да бидат санкционирани лицата, институциите и компаниите кои „го поткопуваат суверенитетот, територијалниот интегритет и уставниот и правниот поредок на Босна и Херцеговина“.
„Националистичките политички елити во српските, хрватските и бошњачките партии намерно ги инструментализираат наводните етнички разлики, се со цел да се збогатат и да ја одржат власта“, се наведува во резолуцијата и конкретно се споменуваат националистичките активности на Милорад Додик и Драган Човиќ, со тврдење дека тие работат на уништување на БиХ како држави и татковини на различни народи.
Резолуцијата содржи и порака до Белград и Загреб.
Така, пратениците во Бундестагот бараат од политичките лидери на Србија и Хрватска да се оградат од националистичките сепаратистички сили во Босна и Херцеговина.
Исто така, резолуцијата бара Берлин силно да го поддржи високиот претставник на меѓународната заедница во Босна и Херцеговина.
Покрај тоа, резолуцијата бара и повторно активирање на Берлинскиот процес.
Во дискусијата за распоредување на војници на Бундесверот во мисијата ЕУФОР/Алтеа, Левица и Алтернатива за Германија (АфД) беа против враќањето на германската армија во Босна и Херцеговина, сметајќи дека тоа ќе долее масло на огнот.
Сепак, владејачките партии и ЦДУ/ЦСУ оценија дека распоредувањето на германски војници, кои последен пат беа во БиХ пред десет години, го спречува ширењето на руското влијание.
Во дискусијата Адис Ахметовиќ, известувач на СПД за Западен Балкан, кој ја иницираше резолуцијата, рече дека е против создавање на трет ентитет во Босна и Херцеговина и посочи дека Берлин мора да ги санкционира сите сепаратисти.
Инаку, на усвојувањето на резолуцијата му претходеше бурна дискусија во самата СПД, како што истакна Ахметовиќ.
