На сите нас во државата треба да ни биде јасно-нема да има подобар договор, нема да има да има нов договор, нема да има друга преговарачка рамка и ова е единствената вистина, која не ја кажувам јас, не ја вели СДСМ, Владата, тоа е ставот на Европската Унија, изјави претседателот на СДСМ Димитар Ковачевски во интервју за Медиумската информативна агенција МИА, пренесуваат од СДСМ чијшто претседател е Ковачевски.
Ковачевски истакна дека нема да има нови барања од страна на Бугарија и дека за тоа постојат цврсти гаранции од највиоските челници на ЕУ но и од самата Бугарија.
„Прилично јасни се работите, нови условувања за нас не може да има. Јасни беа и пораките од меѓународна заедница дека нема да има нови барања. Канцеларот Олаф Шолц за време на нашата заедничка средба, но и потоа јавно посочи дека за Германија нема никакви дилеми дека нови барања надвор од утврдената Преговарачка рамка не може да има. Да потсетам тоа беше децидно кажано и во Декларацијата на германскиот Бундестаг. Дека нема пречки за пристапувањето на Северна Македонија во ЕУ и дека билатералните прашања нема да го одредат пристапниот процес на земјава кон членство во Унијата е и ставот на високиот претставник на ЕУ за надворешна политика Жозеп Борел. Исто така, и Бугарија на повеќе наврати го потврди истото. Претседателот на Бугарија, Радев, потпретседателката Јотова, бугарското МНР, сите тие беа многу јасни во изјавите дека нема нови услови, очекувањата се дека ќе се исполнат договорените услови во преговарачката рамка“ посочи Ковачевски.
Претседателот Ковачевски порача дека е потребен национален општествен консензус за конечно да ја постигнеме стратешката цел, Северна Македонија да стане членка на ЕУ, пренесуваат СДСМ во соопштение.
Макфакс
