ВМРО-ДПМНЕ повторно го обвини обвинителот Ислам Абази дека пред заминувањето од функцијата го „заокружил работењето“ во интерес на СДСМ и ДУИ и дека го заштитил поранешниот министер за здравство Венко Филипче од одговорност во случајот со модуларната болница во Тетово.
Во партиското соопштение се наведува дека модуларните болници за време на ковид-пандемијата биле поставувани како „урбана опрема“, откако тогашната влада го изменила Законот за градење по итна постапка.
Според ВМРО-ДПМНЕ, со тоа било овозможено Министерството за здравство да издава одобренија за нивно поставување.
Партијата тврди дека болниците биле набавени како стоки, а не како објекти за здравствена дејност, додека техничката спецификација, според нив, била изготвена од лице назначено од тогашниот министер Венко Филипче.
Од ВМРО-ДПМНЕ наведуваат и дека Светска банка барала одобренија за поставување и употреба на модуларните болници, како и извод од Катастар, но дека такви документи не можеле да бидат обезбедени затоа што, како што тврдат, процедурата не била запазена.
Партијата посочува дека Катастарот одбивал да ги запише објектите бидејќи биле набавени како стоки и немало извештај од надзор согласно член 74 од Законот за градење.
Во делот за тетовската модуларна болница, каде на 8 септември 2021 година загинаа 14 лица, ВМРО-ДПМНЕ тврди дека тогашниот економски директор Артан Етеми се противел на поставувањето на објектот поради недостиг на приклучоци, надзор и финансиски средства.
Сепак, според партијата, Венко Филипче донел одлука модуларните болници да бидат пуштени во употреба.
„Токму поради ова, обвинетите кажаа дека Венко Филипче треба да седи на обвинителната клупа заедно со нив“, наведуваат од ВМРО-ДПМНЕ.
Од партијата повторуваат и дека предметот, оформен на 10 септември 2021 година, долго време стоел кај обвинителките Вилма Русковска и Елизабета Јосифовска, по што, според нив, Абази го заштитил Филипче.
„Ова не е прв случај во кој Ислам Абази работи во интерес на Заев, Филипче и Ахмети, а сега, пред заминување, си ја доработува задачата“, се наведува во соопштението.
ВМРО-ДПМНЕ дополнително го критикува Филипче за неговите јавни настапи и тврди дека тој се обидува да ја претстави својата работа како министер за здравство како успешна, и покрај случаите и скандалите од тој период.
Станува збор за политички обвинувања на ВМРО-ДПМНЕ.
