На судењето за пожарот во дискотеката „Пулс“ во Кочани, каде загинаа 63 лица, а над 200 беа повредени, денес повторно беа отворени прашања поврзани со безбедноста во судницата, мерките за обезбедување присуство и однесувањето на дел од присутните.
Бранителката на првообвинетиот Дејан Јованов – Деко, адвокатката Ивана Коцевска, реагираше на, како што наведе, изнесени директни закани по неговиот живот на претходното рочиште, барајќи тие да бидат нотирани во записник. Таа побара и исклучување на јавноста, оценувајќи дека е неопходно да се заштитат правата на обвинетите и да се обезбеди ред во судницата.
Судијката Дијана Груевска-Илиевска посочи дека досега ниту една закана не е внесена во записник, нагласувајќи дека судот ќе постапува со опомени, а по потреба и со исклучување на јавноста, но во согласност со правилата и процесните стандарди.
Обвинителството се спротивстави на предлогот за исклучување на јавноста, оценувајќи дека тој е неоснован и дека законските услови за таква мерка не се исполнети. Оттаму нагласија дека јавноста не се однесува на странките и оштетените во постапката.
На рочиштето беа разгледувани и барања за укинување на мерки за обезбедување присуство, кои Судот ги одби како неосновани. Обвинителството информираше и за недостапност на одредени сведоци, поради што предложи нивни претходно дадени искази да бидат прочитани.
Денешната расправа продолжува со сослушување на вешто лице од Институтот за судска медицина.
Пожарот во дискотеката „Пулс“ избувна на 16 март 2025 година за време на настап на групата ДНК и се смета за една од најтешките трагедии во поновата историја на државата.
